Yúte

Ísu kwíyómpaꞋa irówana Yúte Ísun-áváko kae-kwááí aíyayaan-iyaꞋi. kae-kwááí umái siyáánkai-iyaꞋiyo. miráumai-ima maisuwéna maanáímbá agaimái tímakaiye.

Jude

1kemá Yúte Ísu Káráísitina mayáí-kwáásí Yémési áváko maanáímbá maanáúváívímbá agaimaráúmpo ísáaro. Áánútu kentáásivowa arumbá tiména tááyaraiwai Ísu Káráísitimo kawáá uráiwai ísáaro. 2Áánútu arumbá umátinkena imáyáa tiména paru umái mósá kwétinkaintaveꞋa ÁánútumpaꞋa námúnaa kwésimatinkaumne.

3kesí kwaásiyono. Áánútu keinárawate kenté sáwíꞋo umáímo máyaundavinkemba kwéiyasinkaintaveꞋa maanáúváívímbá agayánáe únana Áánútu simásimena séna moórá anón-aimba simáména agayaaó simbá póꞋa mináímbá agayánaumne. ááéma Áánútu kwená kwaási imáyáa timúwasa Ísu Káráísitin-aaiyavesa áraire sésa kwenkáꞋá agevamái máyáan-aimba ísareꞋa mináímbá asiramái tirumpimbá tátoreꞋa máyáamba tuwáúnavo séꞋa kárákwiyoro. Ísu Káráísitin-aaiyavesa sáwí-aimba sewáí tááigona anondá Ísu Káráísitina árair-aimba simátíméro. 4évakaꞋa kampaꞋ-mónó-kwáásí Áánútun-aai íma kwégwaraawai kentí imáyáa tavisénááontavesa komésa tirumpin-ímáyáá ésa sésa Áánútu úwoi súwaꞋnaa enaya íma sínkaminivo kentáásí imáyáavinkenita ónaumne sésa sáwísawaa ésa Ísóigo Ísu Káráísiti kweyáá kentáásí anóndakomba tínaaemba umámakaawe. naaóváꞋá Áánútu mirá-sáwí-máyáígóná sáwí-meyamba timénaumne siráiye. mirán-kámpáꞋ-mónó-kwáásí keinárawate komáyáantaveꞋa maanáímbá kwésimatimune.

5maanáímbá áꞋa simátímakaamba ísaraambanivo ókwaraꞋa simátimenaumpo ísáaro. naaóváꞋá Áánútuna kwaásiyomba Ísípi-maravaꞋa tátokowana Áánútu ayútinkena tíꞋmaena kwétena kwenááiyavesamo ímo árairemo sirówai Áánútu tínkamuwasa pukáawe. 6moórá-aimba imáyáa oro. naaóváꞋá Áánútuna kwayóꞋnárawaꞋa kwíyómpakewai miwítí kawáá-máyáí tuwésa miwítí kaweꞋ-náópáꞋá túwówai Áánútu tíyayaankaꞋa asááúmarena túnkwi-ayampaꞋa sáwí-mapaꞋa tiyuwówasa maíꞋmaiꞋa ésa naaémbo Áánútu sáwí-meyambo timínín-kanaa amuꞋmarésa máyáawe. 7moórá-aimba imáyáa oro. naaóváꞋá Sótómu-naopakewaiye Kómóraa-naopakewaiye mindáór-egwaaꞋ-naopakewaiye sáwíꞋa úmae iyésa aarai-úmóyáné kwaai-úmóyáné mirá úmae íyúwana Áánútu tínkambai iramó kwégaipaꞋa tínkamuwasa iramó kaíkaiꞋo kwéipaꞋa maíꞋmaiꞋa kwéowe. kentáávákwáráꞋá mirá ovó séꞋa kárákwiyoro.

8naaóváꞋá mirámó uráantemba ívéꞋa kampaꞋ-mónó-kwáásí kentí imáyáa tavisénáe sewáí mirá ésa miwítí sáwí-imayaavinkemba áwáyo-tantaaꞋa ésa Áánútumo kwégawaaimba tínaaemba umámesa sáwíꞋa ésa kaweꞋnárawaꞋa kwíyómpakewaiyavesa sáwí-aimba simátínkaraawe. 9ánivo Mósesi pukówana kwíyómpaken-kawaanako áwíꞋa Máíkeri kwemá séna Mósesin-auma mayánáe súwana Sáátáánigo séna kemá mayánáe súwasarai miráumai asiramái suyaná Máíkeri Sáátáánigontavena íma sáwí-aimba súmba kemá íma aaí simánkanaumpo Ísóigo aaí simánkaniye siráiye. 10ánivo kampaꞋ-mónó-kwáásí kentí imáyáa tavisénáe sewáí évaka-tantaakona ááimba íma awánaraantavesa sáwí-aimba simátinkesa kwaí-kwaambo amáparawaina ááimbo ímo awánésamo ontembá miwí mirá owaná miwítí sáwí-imayaago tátorena miwí sáwíꞋa kwéumatinkaiye. 11naaóváꞋá moóráwai áwíꞋa Kááini sáwí-amba kwakáintemba miwí mirá kwéowe. naaóváꞋá moóráwai áwíꞋa Péramu óntan-aamoimo uraíntemba miwí mirá kwéowe. naaóváꞋá moóráwai áwíꞋa Kóra Áánútun-aai araaiséna kawáá-kwáásí táái araaiséna pukáintemba minkámpáꞋ-mónó-kwáásí mirá kwéomba pósa miwí sáwí-meyamba mayánááowe. 12keinárawaꞋa Áánútuna kwaási kwená imáyáa éꞋa toómbá néꞋa torupamái máéntemba kesé miwí komésa sáwíꞋa umátinkesa kesáváí-ímáyáá umái námaꞋ-namaꞋa kwéesa íma tigaemá kwéowe. miwímá kampaꞋ-mónó-kwáásí ésa íma kwétuwaꞋnaa-on-kwaasi máyáawe. miwí taaérambo íyáin-kanaamo arambó ímo íyáin-tairaan-kwaasi máyáawe. úndágomo taaimó taawítúwáísanamo aáyánkaintenkaan-kwaasi máyáawe. 13kavirayán-dómbó kúmísanamo non-awirááímo avoraꞋó kwáíntemba miwítí sáwí-mayai avoraꞋá kwáyáiye. miwímá kentí imáyáa tavisimái sáwí-ampaꞋa métinkanae sen-kwáásí máyáawe. Áánútu miwí túnkain-ayampaꞋa toꞋmayaa umátínkaraimba pósa miváꞋá komaíꞋmaiꞋa ónááowe.

14aiva-kwáásígó áwíꞋa Áándamu ména Sétimba ankówana Sétima Ínósimba ankówana Ínósima Kénáánimba ankówana Kénáánima MáꞋárareomba ankówana MáꞋárareoma Yárétimba ankówana Yárétima Ínókimba ankówana Ínóki mirán-kámpáꞋ-mónó-kwáásíyávéna imáyáa éna séna maísáaro. Ísóigo kwená kaweꞋnárawaꞋa sáwívarawaise téna 15sáwíꞋo uráawaimo amápaꞋo sáwí-meyambo timíndayavena téna Áánútuntavesamo aamoimó ímo ésamo sáwíꞋo uráawaiyavena aaivimbá maitinkáíndayavena téna Áánútuntavesamo aamoimó ímo ésamo simáímo sáwíꞋo umánkaraawaiyavena aaivimbá maitinkáíndayavena kwétiye Ínóki siráiye. 16kentí imáyáa tavisénáe sewáí íꞋái simátínkávaꞋa iyésa amápa-tantaaꞋo miwítópaꞋo tiráimba tirunkó sáwíꞋa kwéisasa sáwí-imayaawe suꞋmai kwégwaresa túma mósá marésa tirááímo tain-tántááꞋá mayánáe sésa simái tirumbá kwéairaraawe.

17kesí kwaásiyono. miwímá mirá-sáwíꞋá kwéombanivo kemá maarán-oro. kentáásí Ísóigo Ísu Káráísitina aantá-kwaasi siráan-aimba imáyáa oro. 18miwí simátimesa sésa naaén-kanaama tínímba Áánútuntavesa íma aamoí ésa sáwí-imayaayavesamo tirááíyavesamo ésa aamoí íyan-kwaasi kentuwíráái sénááowe minántá-kwáásí siráawe. 19miwí tirumpimbá Áánútun-amanko íma máyáísasa miwítí marapár-ímáyáá kwarésa kampaꞋ-mónór-áímbá simái Áánútuna kwaási kwétaainaawe.

20miwí mirá kwéombanivo keinárawaꞋa Áánútuna kawer-áímbá aasiyaasí kwéseꞋa kwenkáꞋá agevamái méꞋa moórá-morawai asiramátinkeꞋa Áánútun-amankona asirayánkóntávéꞋa námúnaa seró. 21Áánútu arumbíya tímakaimba póꞋa arupí umái méꞋa Ísóigo Ísu Káráísiti arumbá umátinkainaꞋa kwíyómpaꞋa aúnáiꞋa umái maíꞋmaiꞋa ónááontaveꞋa amuꞋmáráaro. 22Áánútun-aaiyavesa kaer-ímáyáá tokáawai tirumbá umátinkeꞋa miwítí imáyáa taviseró. 23iramó kaipaꞋá kováínivo Áánútun-aai simátimiyana Áánútu tavisimái kawer-ámpáꞋá métinkaniye. évakarawaiyaveꞋa tirumbá umátinkaiyasa minkwáásí tavisíyaꞋa sáwíꞋa únavo séꞋa miwítí sáwí-mayaiyavena tááꞋa káínaꞋa kentúma kárákwiyoro.

24Áánútu kanaán-umai túwaꞋnaa ínaꞋa íma tínaaemba umámenaaontaveꞋa árair-aimba kwésune. Áánútu tíꞋmaena kwená ságayan-ayampaꞋa métinkainaꞋa kentí sáwí-aimba íma kwáyainana tirunkó anón-kaweꞋa íníntaveꞋa árair-aimba kwésune. 25Áánútu asirayánkwáráwáí mimbóráwáí ména kentáásí Ísóigo Ísu Káráísitina mayáíyávéna imáyáa éna sáwíꞋo umáíya máyaundavinkemba iyásínkáintaveꞋa árair-aimba kwésune. kwená óꞋoran-aaimba kwáyáísana kwenáwíꞋa anómba isaná kwená asirayánkó usáyaaitaisana amápa-tantaakaꞋa kwégawaaiye. naaóváꞋá kwíyómba maramá íma taróruronkaꞋa kwemá ménama ívékwaraꞋa ména maíꞋmaiꞋa kwéintavena árair-aimban-iye kwésune.

kemá Yúte súnda-aimba ánásaiye.